កីឡាករវាយកូនហ្គោលអៀរឡង់ខាងជើងរ៉ូរី ម៉ាក់អុីលរ៉យបានជាប់ឈ្មោះជាកីឡាករឆ្នើមប្រចាំឆ្នាំរបស់ PGA of Americaនិង Vardon Trophyបន្ទាប់ពីធ្វើបានលទ្ធផលល្អប្រចាំរដូវកាល ។ កីឡាករលំដាប់ទី១ពិភពលោករូបនេះបានយកឈ្នះពានជើងឯកចំនួន៤លើកនៅក្នុងសហរដ្ឋអាមេរិកអំឡុងរដូវកាលដែលរូបគេឈានដល់លំដាប់លើគេក្នុងបញ្ជីទឹកប្រាក់ ។ ក្នុងចំណោមជ័យជម្នះទាំងនោះគឺមានបូករួមទាំងជ័យជម្នះសំខាន់លើកទី២របស់គេនៅ US PGAកាលពីខែសីហាផងដែរ ។
ក្រៅពីពានកិត្តិយសទាំង២ខាងលើ ម៉ាក់អុីលរ៉យក៏ស្ថិតនៅជាជនដំបូងគេដែលនឹងឈ្នះពានឆ្នើមប្រចាំឆ្នាំរបស់ PGA Tour ផងដែរ ។ ចំណែកថៃហ្គ័រ វូដជាប់ជម្រើសទី២សម្រាប់ពាន PGA of Americaប៉ុន្តែសម្រាប់ពាន Vardon Trophy(ដែលគិតទៅលើកីឡាករណាមានមធ្យមភាគពិន្ទុទាបបំផុត) គេមិនជាប់ជម្រើសនោះទេ នេះក៏ព្រោះតែការដកខ្លួនដោយសាររបួសរបស់គេពីជុំផ្តាច់ព្រ័ត្រកម្មវិធី WGC Champonshipនៅ Miamiកាលពីខែមីនាកន្លងទៅ ។ ថៃហ្គ័រ វូដមានមធ្យមភាគ៦៨.៩០ធៀបទៅនឹងម៉ាក់អុីលរ៉យដែលមានមធ្យមភាគ ៦៨.៨៧ ។ ប៉ុន្តែផ្ទុយទៅវិញ ជម្រើសទី២បែរជាបានទៅលើកីឡាករអាមេរិកជីម ហ្វឺរីដែលមានមធ្យមភាគ ៦៩.៣ ។
សូមបញ្ជាក់ថា ពាន PGA of Americaត្រូវបានបង្កើតឡើងក្នុងឆ្នាំ ១៩៤៨ខណៈពាន Vardon Trophyត្រូវបានបង្កើតក្នុងឆ្នាំ ១៩៣៧ ។ដោយឡែក សម្រាប់សមាគម PGA Tourក៏មានពានរង្វាន់ឆ្នើមប្រចាំឆ្នាំដើម្បីផ្តល់ជូនឱ្យបណ្តាកីឡាករផ្ទាល់ខ្លួនដែរ ។ ដល់ថ្ងៃទី៣០ខែវិច្ឆិកា សមាជិករបស់សមាគមនេះបញ្ចប់ការបោះឆ្នោតជ្រើសរើសកីឡាករឆ្នើមប្រចាំឆ្នាំ ៕
ចែករំលែកព័តមាននេះ